محمد ایان انصاری کی تکمیل حفظ قرآن کے موقع پر تقریب کا انعقاد

بارہ بنکی: (پریس ریلیز/ابوشحمہ انصاری)مدرسہ اسلامیہ عربیہ شہاب العلوم، شہاب پور میں جمعرات کو تکمیلِ حفظِ قرآن کے موقع پر ایک پُروقار تقریب کا انعقاد عمل میں آیا، جس میں طالب علم محمد ایان بن رضوان احمد انصاری کی دستاربندی کی گئی۔ 17 سالہ محمد ایان نے مفتی محمد سالم قاسمی کی سرپرستی میں اساتذہ کے سامنے تلاوتِ قرآن پیش کرکے حفظِ قرآن کی تکمیل کی۔
تقریب میں مفتی محمد سالم قاسمی، مولانا محمد شاداب، حافظ محمد اعجاز، حافظ محفوظ سمیت مدرسے کے اساتذہ نے محمد ایان کے سر پر دستار باندھی اور ان کے روشن مستقبل کے لیے دعا کی۔ حفظِ قرآن کی تکمیل پر اہلِ خانہ سمیت علاقے میں بھی خوشی کا ماحول رہا۔
رضوان احمد انصاری ہندی صحافت کے شعبے میں سرگرم ہیں اور اپنی صحافتی خدمات کے ذریعے عوامی مسائل کو اجاگر کرتے رہے ہیں۔ اپنے بڑے صاحبزادے کو دینی تعلیم سے آراستہ کرکے حفظِ قرآن کی تکمیل تک پہنچانا ان کے لیے اور اہلِ خانہ کے لیے باعثِ مسرت و افتخار ہے۔
محمد ایان کے دادا محمد سلیم نے مدرسے کے اساتذہ کو مبارکباد پیش کرتے ہوئے کہا کہ پوتے کی تکمیلِ حفظِ قرآن خاندان کے لیے خوشی اور فخر کا موقع ہے۔ اللہ تعالیٰ نے اسے قرآنِ پاک حفظ کرنے کی عظیم نعمت سے نوازا ہے۔
مفتی محمد سالم قاسمی نے اپنے شاگرد محمد ایان کو ذہین اور محنتی طالب علم قرار دیتے ہوئے کہا کہ وہ پڑھنے میں خاصی دلچسپی رکھتے تھے۔ انہوں نے حفظِ قرآن کی فضیلت بیان کرتے ہوئے کہا کہ احادیثِ مبارکہ میں حافظِ قرآن کے لیے بڑی فضیلت بیان ہوئی ہے۔ ایک روایت کے مطابق حافظِ قرآن کو اپنے خاندان کے دس افراد کے حق میں شفاعت کی اجازت دی جائے گی، جن میں ایسے شخص کے لیے بھی شفاعت کا ذکر ہے جس کے لیے جہنم کا فیصلہ ہوچکا ہو۔
تقریب میں قاری محمد وکیل، حافظ محمد اشفاق، قاری فضیل، حافظ عالم، حافظ سفیان، ماسٹر افتخار، حافظ ناوید، قاری عالم، محمد عمران اور محمد آصف سمیت مدرسے کے اساتذہ و طلبہ موجود رہے۔